నీ స్వప్నం

నడక చివరి శూన్యం లోంచి
అడుగుల క్రింద నలిగిన ఆలోచనల్లోంచి . .
అలల పరుగుతో వచ్చి చెక్కిలి నిమిరిన చిరుగాలి
నీ జ్జ్ఞాపకమే . .
నీవు లేని ఆలోచన, నీతో రాని వసంతం
అర్ధాంతరం . . అసంపూర్ణం . .
కాలం వెంట దేహం పరిగెడుతున్నా
యవ్వనమక్కడే ఆగిపోయింది నీకోసం . .
గుండెను గులాబీ మొక్కకు గుచ్చి ఉంచాను
నువ్వొస్తే తుంచి తలలో పెట్టుకొంటావని . . .
పెదాల మీద ఎండి పోతున్న ఈ పువ్వు
నీ నవ్వే . .
గొంతులో చిధ్రమవుతున్న ఈ పదాలు
నీ మాటలే . .
కనుల మీద చీకటి ఆరబోసిన ఈ దృశ్యం
నీ చూపే . .
జీవితానికి తలుపులు మూయలేదింకా
కలని కౌగలించుకొందామని . .
సుతి మెత్తని అడుగులతో నువ్వొస్తావనే ఆశతోనే . .
నా స్వప్నానికి శిలువ వేయలేదింకా . .